మళ్లీ భగ్గుమన్న క్రూడ్ ఆయిల్.. బ్యారెల్ 110 డాలర్లకు చేరిక

పశ్చిమాసియాలో ఉద్రిక్తతలు కొనసాగుతున్న నేపథ్యంలో అంతర్జాతీయ మార్కెట్‌లో ముడి చమురు ధరలు మరోసారి భగ్గుమన్నాయి. అమెరికా-ఇరాన్ మధ్య శాంతి ఒప్పందంపై నెలకొన్న అనిశ్చితి కారణంగా, బ్రెంట్ క్రూడ్ ఆయిల్ ధర బ్యారెల్‌కు 110 డాలర్ల మార్కును దాటింది. దీంతో చమురు సరఫరాపై ప్రపంచవ్యాప్తంగా ఆందోళనలు వ్యక్తమవుతున్నాయి.

బుధవారం నాటి ట్రేడింగ్‌లో బ్రెంట్ క్రూడ్ ధర ఒక శాతానికి పైగా పెరిగి బ్యారెల్ 110.15 డాలర్లకు చేరుకుంది. మరోవైపు, వెస్ట్ టెక్సాస్ ఇంటర్మీడియట్ (డబ్ల్యూటీఐ) ధర మంగళవారం బ్యారెల్ 101.79 డాలర్ల వద్ద ముగిసింది. మంగళవారం ధరలు స్వల్పంగా తగ్గినప్పటికీ, తాజా పరిణామాలతో మళ్లీ ఎగబాకాయి.

ఇరాన్‌తో శాంతి ఒప్పందం కుదరడం అత్యంత క్లిష్టమని అమెరికా విదేశాంగ మంత్రి మార్కో రూబియో వ్యాఖ్యానించారు. హర్మూజ్ జలసంధిలో వాణిజ్య నౌకలపై దాడులు నిలిచిపోయే వరకు ఇరాన్‌పై ఆర్థిక ఒత్తిడి కొనసాగుతుందని ఆయన స్పష్టం చేశారు. దీనిపై ఇరాన్ విదేశాంగ మంత్రి అబ్బాస్ అరాఘ్చి స్పందిస్తూ, అమెరికా తమ షరతులను అంగీకరించే వరకు హోర్ముజ్ జలసంధిని తిరిగి తెరిచే ప్రసక్తే లేదని తేల్చిచెప్పారు.

అణ్వస్త్ర సామగ్రిని రష్యా నియంత్రణకు అప్పగించే ప్రతిపాదనను కూడా ఇరాన్ తిరస్కరించింది. పరస్పర విరుద్ధ ప్రకటనలతో ఇరు దేశాల మధ్య చర్చల్లో ప్రతిష్టంభన నెలకొంది. ఈ ఉద్రిక్తతల ప్రభావంతోనే చమురు ధరలు పెరుగుతున్నాయని మార్కెట్ విశ్లేషకులు అభిప్రాయపడుతున్నారు.